கோவை மாவட்டம்
மேட்டுப்பாளையம்
தமிழகத்தில் மக்கள் தொகை கணக்கெடுப்புப் பணி வரும் ஜூலை 17-ஆம் தேதி தொடங்குகிறது. வரலாற்றிலேயே முதன்முறையாக இம்முறை டிஜிட்டல் மற்றும் ‘சுய கணக்கெடுப்பு’ (Self-Enumeration) முறையில் இந்த பணிகள் நடத்தப்பட உள்ளன.
இப்பணியை மேட்டுப்பாளையம் நகராட்சிப் பகுதியில் நூறு சதவீதம் (100%) வெற்றிகரமாக நிறைவு செய்ய, கோவை மாவட்ட நிர்வாகம் நகராட்சி நிர்வாகம் இணைந்து பல்வேறு சிறப்பு மற்றும் அதிநவீன விழிப்புணர்வு ஏற்பாடுகளை முடுக்கிவிட்டுள்ளன.
பொதுமக்களுக்கான பிரத்யேக சேவை மையங்கள்
தொழில்நுட்பக் குறைபாடுகளாலோ அல்லது விழிப்புணர்வு இன்மையாலோ எந்தவொரு குடும்பத்தின் விவரமும் விடுபட்டுவிடக் கூடாது என்பதில் மேட்டுப்பாளையம் நகராட்சி நிர்வாகம் மிகத் தீவிரமாகச் செயலாற்றி வருகிறது. அதன்படி:
நகராட்சி அலுவலக சேவை: அனைத்து வேலை நாட்களிலும் மேட்டுப்பாளையம் நகராட்சி அலுவலகத்தில் பொதுமக்களுக்கு ஆன்லைனில் விவரங்களைப் பதிவு செய்து தரும் பிரத்யேக உதவி மையம் தங்குதடையின்றிச் செயல்படும்.
அதிநவீன விழிப்புணர்வு மையங்கள்: பொதுமக்கள் அதிகம் கூடும் இடங்களான மேட்டுப்பாளையம் பேருந்து நிலையம், உழவர் சந்தை, மணி நகர் நகராட்சி அறிவுசார் மையம், ரயில் நிலையம் மற்றும் தினசரி மார்க்கெட் உள்ளிட்ட பொதுமக்கள் அதிகக்கூடும் முக்கியப் பகுதிகளில் நகராட்சி சார்பில் விழிப்புணர்வு மற்றும் வழிகாட்டுதல் முகாம்கள் அமைக்கப்பட உள்ளன
100% இலக்கை எட்ட நகராட்சியின் வியூகம் (அதிகாரப்பூர்வ வேண்டுகோள்)
மேட்டுப்பாளையம் நகராட்சிப் பகுதியில் வசிக்கும் அனைத்துத் தரப்பு மக்களும் இந்த டிஜிட்டல் கணக்கெடுப்பில் தங்களை இணைத்துக் கொள்வதை உறுதி செய்ய விரிவான திட்டமிடல் செய்யப்பட்டுள்ளது.
இப்பணி தொய்வின்றி முழுமையடைய, நகராட்சிப் பகுதியில் உள்ள பொதுமக்கள், தன்னார்வத் தொண்டு அமைப்புகள், சமூக நல அமைப்புகள், பள்ளி மற்றும் கல்லூரி நிர்வாகங்கள் ஆகிய அனைவரும் தங்களின் முழுமையான ஒத்துழைப்பை நல்க வேண்டும் என மாவட்ட நிர்வாகமும், மேட்டுப்பாளையம் நகராட்சி நிர்வாகமும் கூட்டாகக் கேட்டுக்கொண்டுள்ளன.
டிஜிட்டல் முறையில் ஆன்லைனில் பதிவு செய்வது எப்படி?
ஒரு குடும்பத்திற்கு ஒரேயொரு மொபைல் எண் வாயிலாக மட்டுமே விவரங்களைப் பதிவு செய்ய முடியும். குடும்பத் தலைவர் அல்லது குடும்பத்தில் உள்ள விவரம் தெரிந்த எவரேனும் இந்த விவரங்களைப் பதிவு செய்யலாம்.
இணையதளத்திற்குச் செல்லுதல்: முதலில் https://se.census.gov.in/ என்ற அதிகாரப்பூர்வ இணையதளப் பக்கத்திற்குச் செல்ல வேண்டும்.
மாநிலத் தேர்வு: முகப்புப் பக்கத்தில் ‘தமிழ்நாடு’ மாநிலத்தைத் தேர்வு செய்து, திரையில் தோன்றும் பாதுகாப்பு குறியீட்டு எண்ணை (Captcha) உள்ளிட வேண்டும்.
அடிப்படை விவரங்கள்: அடுத்து தோன்றும் பக்கத்தில் குடும்பத் தலைவர்/தலைவியின் பெயர் மற்றும் மொபைல் எண்ணைப் பதிவு செய்ய வேண்டும்.
மொழித் தேர்வு & OTP: உங்களுக்கு விருப்பமான மொழியைத் தேர்வு செய்த பின், மொபைல் எண்ணுக்கு வரும் ஒருமுறை பயன்படுத்தும் கடவுச்சொல் (OTP) மூலம் கணக்கை உறுதிப்படுத்த வேண்டும்.
இருப்பிடத் தேர்வு: அடுத்து கோவை மாவட்டம், மேட்டுப்பாளையம் பகுதி ஆகியவற்றைத் தேர்வு செய்ய வேண்டும். தொடர்ந்து திரையில் தோன்றும் வரைபடத்தில் (Map) உங்களது வீடு இருக்கும் பகுதியைத் துல்லியமாகக் கண்டறிந்து சேமிக்க (Save) வேண்டும்.
கேள்வித்தாள் பகுதி: இதன் பின்னர் 33 கேள்விகள் அடங்கிய பக்கம் தோன்றும். பெரும்பாலான கேள்விகள் ‘விருப்பத் தேர்வு’ (Multiple Choice) முறையிலேயே அமைந்திருக்கும்.
முக்கியக் குறிப்பு:
அனைத்து விவரங்களையும் வெற்றிகரமாகப் பதிவு செய்து முடித்ததும், திரையில் 11 இலக்கப் பதிவு எண் தோன்றுவதுடன், மொபைல் எண்ணுக்கும் 12 இலக்க அடையாள எண் (ID) குறுஞ்செய்தியாக வந்து சேரும்.
பின்னர், உங்களது பகுதிக்கு நியமிக்கப்பட்ட கணக்கெடுப்பாளர் (Enumerator) நேரில் வரும்போது, இந்த 12 இலக்க அடையாள எண்ணை மட்டும் அவரிடம் காண்பித்தால் போதுமானது. எனவே, மேட்டுப்பாளையம் நகர பொதுமக்கள் இந்த நல்வாய்ப்பைப் பயன்படுத்தி, ஜூலை 17 முதல் ஜூலை 31-க்குள் தங்களது சுய கணக்கெடுப்புப் பணியை நிறைவு செய்யுமாறு கேட்டுக் கொள்ளப்படுகிறார்கள்.
